Gemini Live වෙත එන Memory සහ Connected Apps

Google සමාගම තම AI සහායකයා වන Gemini Live සඳහා නවතම update එකක් නිකුත් කරමින්, පරිශීලකයින්ගේ පෙර සංවාද (Past Chats) සහ Connected Apps හරහා ලැබෙන තොරතුරු භාවිතා කිරීමේ හැකියාව එක් කර තිබේ. මෙම වෙනස හේතුවෙන් Gemini Live හට පෙර සංවාදවලින් මතක තබාගත් තොරතුරු භාවිතා කරමින් වඩාත් පුද්ගලීකරණය වූ සහ ප්‍රයෝජනවත් පිළිතුරු ලබාදීමට හැකි වනු ඇත. Google I/O 2026 උත්සවයේදී හඳුන්වා දුන් නව Gemini අත්දැකීම සමඟ Voice සහ Text සංවාද අතර වේගවත් ලෙස මාරුවීමේ හැකියාවද ලබාදී තිබුණි. එමෙන්ම YouTube, Google Workspace, Utilities, Image Generation ඇතුළු Connected Apps සමඟ වැඩි ඒකාබද්ධතාවයක්ද Gemini Live වෙත එක් කර ඇත. කෙසේ වෙතත්, Google Messages සමඟ සෘජු සම්බන්ධතාවය තවමත් ලබාදී නොමැති බව වාර්තා වේ.

Google අනුව, Gemini Live භාවිතා කරන අවස්ථාවේදීද සාමාන්‍ය Gemini Chat සඳහා ලබාදී ඇති Privacy සහ Permission සැකසුම්ම ක්‍රියාත්මක වන අතර, පරිශීලකයා අනුමත කර ඇති Memory තොරතුරු පමණක් භාවිතා කරයි. මේ වන විට මෙම පහසුකම ඇමරිකා එක්සත් ජනපදයේ සිටින ඉංග්‍රීසි භාෂාව භාවිතා කරන පරිශීලකයින්ට ලබාදී ඇත. Google තවදුරටත් පවසන්නේ Gemini හට පරිශීලකයන් විසින් සඳහන් කරන වැදගත් තොරතුරු, උදාහරණයක් ලෙස ආහාර පුරුදු, පවුලේ විශේෂ දිනයන්, හෝ විනෝදාංශ වැනි දෑ ආරක්ෂිතව මතක තබාගෙන, අනාගත සංවාදවලදී නැවත නැවතත් එම තොරතුරු ඇසීමෙන් තොරව වඩාත් සම්බන්ධිත පිළිතුරු ලබාදිය හැකි බවයි. කෙසේ වෙතත්, Android උපාංගවල Gemini හි Personal Intelligence Settings පිටුවෙහි තවමත් “Memory for Live - Coming Soon” ලෙස සටහන් වී ඇති අතර, මෙම පහසුකම සියලු පරිශීලකයින් වෙත ලැබීමට තවදුරටත් කාලයක් ගතවිය හැකි බව පෙනී යයි.